Fargjöld Flugrútunnar hækkuðu um tvö hundruð krónur um síðustu mánaðarmót og kostar nú farið frá BSÍ að Leifsstöð 2.700 krónur. Framkvæmdastjóri Kynnisferða segir að þrátt fyrir aukin kostnað, svosem vegna launahækkana þá hafi verðið ekki hækkað í rúmt ár.
Þetta kemur fram á vef Túrista.
Á meðan verðið hækkar í Flugrútuna helst farmiðaverðið óbreytt hjá Gray Line sem býður upp á sætaferðir til og frá Keflavíkurflugvelli með Airport Express en þar kostar farmiði báðar leiðir 3.900 krónur. Það fullyrðir Þórir Garðarsson, stjórnarformaður Gray Line og kveðst um leið þakklátur fyrir að markaðshlutdeild fyrirtækisins sé að aukast.
Jafnframt kemur fram að þrátt fyrir að Gray Line fái ekki aðstöðu beint við útgang flugstöðvarinnar þá hafa forsvarsmenn þess boðað áframhald á áætlunarferðum sínum milli Holtagarða og Keflavíkurflugvallar. Mun þá vera notast við sömu stoppustöð og Strætó nýtir fyrir sínar ferðir til og frá Keflavíkurflugvelli.