Egill varpar ljósi á möguleg næstu skref nú þegar viðræðum hefur verið slitið

Stjórnarmyndunarviðræðum slitið - Hvað gerist næst?

Mynd: DV ehf / Sigtryggur Ari

„Samkvæmt fréttum er búið að slíta stjórnarmyndunarviðræðum að frumkvæði Framsóknarflokksins. Kannski var ekki von á öðru, meirihluti vinstri stjórnar hefði verið afar tæpur. Menn verða svo að svara því hversu mikil heilindi voru í viðræðum flokksformannanna og pítsuveislunni í Syðra-Langholti.“

Mynd: DV ehf / Sigtryggur Ari

Þetta segir fjölmiðlamaðurinn Egill Helgason í pistli á vef Eyjunnar. Yfirskrift pistilsins er: Bjuggust menn við öðru? – Næst verður reynd hægri stjórn.

Eins og greint var frá í hádeginu sleit Framsóknarflokkurinn viðræðunum á þeim forsendum að meirihutinn, 32 þingmenn gegn 31 þingmanni stjórnarandstöðunnar, væri of tæpur.

„Vildu menn í alvörunni mynda stjórn eða var þetta leiksýning til að geta síðar farið með stjórnarmyndunarviðræður allt annað,“ spyr Egill og bætir við að ekki sé ólíklegt að næstu daga muni ganga á með brigslum um óheilindi.

Hann segir að Katrín Jakobsdóttir, formaður Vinstri grænna, hljóti að skila stjórnarmyndunarumboðinu í dag og líklega muni Bjarni Benediktsson, formaður Sjálfstæðisflokksins, fá það. Líklega til að mynda hægri stjórn.

„Reyndar er víst að draumaríkisstjórn bæði Bjarna Benediktssonar og Sigurðar Inga Jónssonar er stjórn með Vinstri grænum. Það er ekki enn kominn tími til að reyna að mynda hana, en það gæti gerst þegar nær dregur jólum, þegar ef til vill hefur mistekist að mynda stjórnina til hægri.“

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.