Karlmaður fæddur árið 1989 hefur verið dæmdur í þriggja mánaða skilorðsbundið fangelsi fyrir að hafa farið inn í herbergi þar sem kona svaf klæðalítil og strokið henni um lærin.
Maðurinn var ákærður fyrir að hafa stungið fingur í leggöng hennar en sýknaður af því. Dómari komast að þeirri niðurstöðu að þrátt fyrir að sálfræðingur bæri vitni um að konan lýsti einkennum áfallastreituröskunar þá væri of mikill vafi uppi um hvort maðurinn hafi stungið fingri í leggöng konunnar gegn hennar vilja. Atvikið átti sér stað árið 2015.
Óumdeilt var í dómnum að maðurinn hefði farið inn í herbergið þar sem konan lá sofandi. Hann viðurkenndi að hafa strokið um læri hennar en vildi meina að það hafi verið vinarþel og hann hafi með þessu viljað gera vart við sig.
„Þessum framburði ákærða er hafnað eins og að framan greinir og verður lagt til grundvallar að háttsemi ákærða hafi verið af kynferðislegum toga. Breytir hér engu að brotaþoli hafi ekki lýst stroku á læri, enda hefur komið fram hjá henni að hún hafi verið sofandi,“ segir í dómi.
Í skýrslutöku hjá lögreglu kvaðst maðurinn ekki muna hvort hann hafi komið við kynfæri konunnar en fyrir dómi sagðist hann aðeins hafa strokið henni um læri örstutta stund. „Þá þykja ekki mjög trúverðugar skýringar ákærða, en hann hefur neitað því að þetta hafi verið í kynferðislegum tilgangi, en fyrir liggja framburðir um að ákærði hafi haft áhuga á brotaþola og verður að leggja til grundvallar að hann hafi girnst hana miðað við það að fara inn í svefnherbergi þar sem hún lá klæðlítil og snerta á henni læri,“ segir í dómi.