Viðskiptavinir tískuvörukeðjunnar Zara í Istanbul í Tyrklandi hafa fengið óþægileg skilaboð með fatnaði sem þeir kaupa í verslununum. Innan í vörunni er merki þar sem á stendur: „Ég bjó til þessa vöru sem þú ert að fara að kaupa en ég fékk ekki borgað fyrir það.“

Talið er að starfsfólk hjá aðila sem Zara og fleiri tískuvöruframleiðendur hafa útvistað fatagerð til hafi farið inn í verslanir og skilið eftir skilaboð af þessu tagi í vörunum. Starfsfólkið segir að framleiðandinn skuldi því þriggja mánaða laun og launatengd fríðindi.

Zara hefur sent frá sér yfirlýsingu þar sem segir að vörur fyrirtækisins séu framleiddar undir ströngu eftirliti og tryggt sér að reglum sé fylgt í hvívetna. Yfirlýsingin hefur þó engan veginn slegið á þessar ásakanir.

Herferð til að fá tískuvörukeðjurnar Zara, Next og Mango til að hætta viðskiptum við óheiðarlega framleiðendur hefur verið sett upp á https://www.change.org/p/justiceforbravoworkers.

Þá krefst starfsfólkið sem hefur verið hlunnfarið þess að fá vangoldin laun sín greidd. Nánar er fjallað um málið á Metro.