„Píratar virðast hreinlega þurfa að fórna allri sinni ásýnd til að komast í ríkisstjórn. Ekki bara munu þeir setjast í ríkisstjórn sem nýtur stuðnings minnihluta kjósenda, en meirihluta þingmanna – þvert á fögur fyrirheit – heldur þurfa þeir einnig að fórna sinni grunnstefnu um beint lýðræði og loforðum um aðkomu almennings að ákvörðunum sem koma honum við. Reynslumikla þingmenn hlýtur að hrylla við tilhugsuninni um að tvær ríkisstjórnir í röð verði sprengdnar í netkosningum.”
Þetta segir Kristín Þorsteinsdóttir, ritstjóri Fréttablaðsins, í leiðara blaðsins í dag. Í frétt í blaðinu í dag kemur jafnframt fram að framhald stjórnarmyndunarviðræðnanna sem nú standa yfir skýrist á mánudaginn.
Kristín segir að auðveldast verði fyrir Framsóknarflokkinn og Vinstri græn að ná saman í viðræðunum því hvorugur flokkurinn sé með kröfur um breytta stefnu í myntmálum né vilji ganga í Evrópusambandið. Þá vilji báðir flokkarnir
standa vörð um óbreytt landbúnaðarkerfi.
Samfylkingin þurfi hins vegar að gefa eftir stór stefnumál sín til að hægt sé að mynda stjórnina:
Samfylkingin mun þurfa að leggja niður vopn þegjandi og hljóðalaust í Evrópumálum. Krónan verður þess utan fest í sessi sem gjaldmiðill þjóðarinnar á komandi kjörtímabili. Stjórnarþátttaka getur beinlínis reynst flokknum hættuleg nú eftir að hann virðist á góðri leið með að rétta sig af eftir afhroðið fyrir ári.
Kristín bendir á að vinstri stjórnin sem er í kortunum geti á von á mjög harðri stjórnarandstöðu frá Sjálfstæðisflokknum, Miðflokknum og Viðreisn, ofan í það að vera með naumasta mögulega meirihluta. Ekki bara stjórnarsamstarfið heldur framtíð sjálfra flokkanna sé í veði.
Enginn af flokkunum fjórum þurfi hins vegar að fórna eins miklu og Píratar – hvorki meira né minna en allri sinni ásýnd.