Ríkisstjórn Vinstri grænna, Sjálfstæðisflokks og Framsóknarflokks tekur við kl. 15 í dag á Bessastöðum. Kl. 14:30 fundar ríkisstjórn Bjarna Benediktssonar og lýkur störfum. Kl. 15 fundar svo ný ríkisstjórn og Guðni Th. Jóhannesson mun skipa fyrsta ráðuneyti Katrínar Jakobsdóttur.
Ríkisstjórnin verður með 33 manna meirihluta á þingi en tveir þingmenn Vinstri grænna, þau Rósa Björk Brynjólfsdóttir og Andrés Ingi Jónsson, höfnuðu stjórnarsáttmálanum.
Katrín Jakobsdóttir formaður Vinstri grænna, Bjarni Benediktsson formaður Sjálfstæðisflokksins og Sigurður Ingi Jóhannsson formaður Framsóknarflokksins undirrita stjórnarsáttmálann kl.11 á Listasafni Íslands.