Þrjú létust í umferðarslysi á Árskógssandi

Karlmaður, kona og barn voru úrskurðuð látin í kvöld en þau höfðu verið flutt á Sjúkrahús Akureyrar eftir að bíll með þau innanborðs lenti í sjónum við höfnina á Árskógssandi. Þetta kemur fram í tilkynningu frá Lögreglunni á Norðurlandi eystra. Ekki er hægt að greina frá nöfnum hinna látnu að svo stöddu en málið er í rannsókn.

Í fyrri tilkynningu lögreglunnar um málið segir:

Um kl. 17:30 í dag fékk lögreglan á Norðurlandi eystra tilkynningu um alvarlegt umferðarslys, að bifreið með þremur aðilum innanborðs hafi lent fram af bryggjunni á Árskógssandi. Viðbragðsaðilar voru kallaðar út og hafa þeir aðstoðað lögreglu á vettvangi. Viðbragðsaðilar hafa náð öllum aðilum úr bifreiðinni og er verið að flytja þá á Sjúkrahús Akureyrar.

Þá var einnig óskað eftir aðstoð Landhelgisgæslunnar og viðbragðsaðila fyrir sunnan en búið var að ná aðilum úr bifreiðinni áður en til þess kom.

Ekki er grunur um að neitt saknæmt hafi átt sér stað. Nánari tildrög slyssins liggja ekki fyrir en rannsókn málsins heldur áfram og því ekki hægt að veita frekari upplýsingar að sinni.

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.