Starfsmenn sofna standandi – Sjúkrabílar vegna örmagna starfsfólks
Breskur blaðamaður Sunday Mirror, Alan Selby, að nafni réði sig nýlega í vinnu í vöruhús Amazon, einnar stærstu netverslunar heims. Óhætt er að segja að rannsókn hans á aðbúnaði starfsfólks hafi vakið mikla athygli.
Fjallað er um þetta á vef breska blaðsins Independent, en Selby starfaði fyrir fyrirtækið í fimm vikur. Síðasta vaktin hans var síðasta föstudag, á sjálfan Black Friday.
Í umfjöllun Selby kemur fram að dæmi séu um að starfsfólk sofni í vinnunni standandi vegna of mikils álags. Starfsfólk þurfi að standast miklar kröfur um afköst og sumir hreinlega brotni undan álaginu. Þá hafi yfirmenn tekið tímann hjá starfsfólki sem þurfti að fara á klósettið.
Loks séu dæmi um að starfsmenn hafi verið þvingaðir til að vinna yfirvinnu og sumir hafi þurft að vinna 55 klukkustundir í viku, 11 klukkustundir á dag miðað við fimm daga vinnuviku.
Þetta er ekki í fyrsta sinn sem Amazon liggur undir gagnrýni um slæma framkomu við starfsfólk. Árið 2015 var til dæmis greint frá hrikalegu álagi á starfsfólk í ítarlegri umfjöllun New York Times.
Tveimur konum, ein sem greindist með brjóstakrabbamein og önnur sem nýverið hafði eignast barn sem fæddist andvana, var sem dæmi tjáð að ef þær myndu ekki standa sig betur í vinnunni yrðu þær reknar. Þeim var sagt að vinnan ætti að ganga fyrir.
Alan tók meðal annars myndir af samstarfsmönnum sínum og á þeim mátti til dæmis sjá starfsmenn dotta standandi. Þá segir Alan í grein sinni að nokkrum sinnum hafi sjúkrabílar verið kallaðir í vöruhúsið í Essex á Englandi þar sem starfsmenn áttu það til að falla í yfirlið eða örmagnast.
Sjálfur segir Alan að hann hafi átt að afgreiða 120 pantanir á klukkutíma en sá fjöldi átti síðan að fara upp í 200 með tíð og tíma. Fyrir vinnuna fékk hann greidd 8,2 pund, eða 1.130 krónur, á tímann. „Hér þjást allir. Ég tognaði aftan í læri en mér var sagt að halda bara áfram,“ sagði samstarfsmaður Alans við hann.
Amazon hefur sent frá sér yfirlýsingu vegna málsins þar sem því er vísað á bug að illa sé komið fram við starfsfólk. „Amazon býður upp á öruggt og jákvætt vinnuumhverfi með samkeppnishæfum launum og hlunnindum. Við erum stolt af því að hafa skapað þúsundir nýrra starfa í Bretlandi.“
