Ýmislegt bendir til þess að draugaskip sem rak upp að ströndum Japans á dögunum sé frá Norður-Kóreu. Ófögur sjón blasti við fulltrúum japanskra yfirvalda þegar þeir fóru um borð í skipið: Þar fundust líkamsleifar átta einstaklinga en svo virðist vera sem þeir hafi verið látnir lengi. Ekkert nema beinagrindur blöstu við.
Lögregla telur að skipið og skipverjar þess séu frá Norður-Kóreu. Byggist sú kenning á tómum sígarettupakka sem fannst um borð en tegundin sem um ræðir er sú vinsælasta í Norður-Kóreu. Ekki liggur fyrir hvenær skipverjarnir létust eða hvers vegna.
Ekki er óalgengt að draugaskip reki að ströndum Japans. Í frétt Washington Post kemur fram að það sem af er þessu ári hafi 40 báta eða skip rekið að ströndum landsins. Árið 2016 var heildarfjöldinn 66 en í öllum tilvikum voru látnir einstaklingar um borð.
Skipið sem fannst á dögunum fannst undan ströndum norðurhluta Japans. Var það 68 ára kona sem kom auga á skipið. Ekki liggur fyrir hvort um hafi verið að ræða sjómenn eða hvort fólkið hafi verið að reyna að flýja frá Norður-Kóreu.
Talið er að um 30 þúsund manns hafi flúið frá Norður-Kóreu eftir að hungursneyð skall á um miðjan tíunda áratuginn.