„Við erum langt komin. Við erum ekki búin að loka málinu en það hvílir á okkur að gera það í raun og veru í dag eða á morgun.“ Þetta sagði Katrín Jakobsdóttir formaður Vinstri grænna í þættinum Sprengisandi á Bylgjunni í morgun.
Ríkisstjórnarviðræður Vinstri grænna, Sjálfstæðisflokks og Framsóknarflokks eru vel á veg komnar, sagði Katrín að málefnasamningur liggi nánast fyrir fyrir utan nokkra málaflokka. Nú á lokametrunum sé verið að fara yfir tillögur í fjárlögum en fjárlög ársins 2018 þarf að klára fyrir jól og því taka stjórnarmyndunarviðræðurnar lengri tíma nú en þær hefðu gert að vori. Því séu þessar viðræður tvíþætt ferli:
Við erum að fara yfir tillögur í fjárlögum samhliða þessum lokametrum í málefnasamningi.
Katrín sagði að aðeins ætti eftir lokahnykkinn við að loka ákveðnum málaflokkum. Varðandi samstarf við Sjálfstæðisflokkinn, sem hefur verið gagnrýnt innan raða Vinstri grænna, sagði Katrín að vissulega væri áhætta fólgin í samstarfinu en að stjórnmálin þyrftu að snúast um hagsmuni samfélagsins en ekki einstaklinga eða flokka.