„One small step for man, one giant leap for mankind“, sagði Neil Armstrong þegar hann steig fyrstu manna fæti á tunglið 1969. Svo sannarlega söguleg stund og áfram héldu menn að fara til tunglsins næstu árin en 1972 fór Apollo 17 þangað og var það í síðasta sinn, að sinni, sem menn gengu um yfirborð þessa fylgihnattar okkar. En var þetta allt saman kannski bara blekking ein? Fóru menn kannski alls ekki til tunglsins? Var þetta allt saman sviðsett í kvikmyndaveri hér á jörðu niðri?
Þessara spurninga hefur verið spurt í gegnum tíðina en margir hafa áhuga og skoðanir á málinu og samsæriskenningasmiðir hafa mikinn áhuga á þessu.
Í nýju myndbandi, sem hefur fengið mikið áhorf síðustu daga, er þeirri spurningu varpað fram hvort mynd af Eugene Cernan, á göngu á tunglinu, sýni og sanni að allt hafi þetta verið sviðsett. Á myndinni sést hann á göngu með myndavél í hönd. Í fyrstu er ekkert athugavet að sjá við myndina en ef þysjað er inn sést eitthvað birtast í speglun á gleri á hjálmi Cernan.
Eftir því sem samsæriskenningasmiðir segja þá er það maður sem sést speglast í glerinu og það sem meira er hann er ekki í geimbúningi. Youtube notandinn Streetcap1 segir að maðurinn líkist venjulegum ungum manni á áttunda áratugnum, með sítt hár og í vesti.
Independent segir að Apollo 17 hafi verið lengsta tunglferðin en hún stóð yfir frá 7. desember til 19. desember 1972.
Í kjölfar birtingar myndbandsins á Youtube hafa fjölmiðlar reynt að fá viðbrögð frá bandarísku geimferðastofnuninni NASA en án árangurs því stofnunin hefur þá stefnu að tjá sig ekki um samsæriskenningar.
