Lögreglan í Colorado í Bandaríkjunum hefur handtekið fimmtán ára pilt sem grunaður er um að hafa stungið nítján ára konu til bana um helgina.
Fórnarlambið, Makayla Grote, var stungin á heimili sínu í Longmont en áður hafði drengurinn átt í SMS-samskiptum við yngri systur hennar. SMS-sendingarnar voru tilkynntar til lögreglu áður en pilturinn lagði til atlögu á heimili systranna. Yngri systurinn tókst að flýja inn á baðherbergi en pilturinn yfirgaf íbúðina þegar hann komst ekki inn á baðherbergið.
Við húsleit á heimili piltsins, sem ekki er nafngreindur vegna ungs aldurs, fannst listi yfir einstaklinga sem hann vildi drepa. Systir Makaylu var á listanum en við nafn hennar stóð að hann myndi einnig drepa hvern þann sem myndi reyna að koma í veg fyrir morðið.
Lögregla handtók piltinn aðfaranótt sunnudags en þá hafði hann tekið bifreið foreldra sinna og var hann skammt frá heimili einstaklings sem var númer þrjú á umræddum lista. Ekki liggur fyrir hvort hann hafi verið á leiðinni til hans þó lögregla útiloki það ekki.
Saksóknarar segja að til greina komi að fara fram á að réttað verði yfir piltinum líkt og um fullorðinn einstakling sé að ræða. Áður en hann framdi morðið um helgina réðst pilturinn á afa sinn og ógnaði móður sinni með hníf.