Þann 16. maí fannst lík Tova Moberg í vatni á landareign fyrrum unnusta hennar í Hudiksvall í Svíþjóð en mikil leit hafði staðið yfir að Tova. Unnustinn fyrrverandi situr í varðhaldi vegna málsins en réttarhöld í málinu hefjast fljótlega. Hann er ákærður fyrir að hafa myrt Tova sem var aðeins 19 ára þegar hún lést. Í dagbók sinni lýsti Tova þeim misþyrmingum sem hún hafði sætt af hálfu unnustans á meðan á sambandið þeirra stóð.
„Ég get ekki lagfært þetta, þetta versnar bara. Næst drepur hann mig.“
Skrifaði hún í dagbókina eftir því sem kemur fram í Expressen. Í lokin skrifaði hún síðan hvar hún hafði geymt sannanir fyrir ofbeldinu.
„Það eru sannanir. Rauður og silfurlitaður minnislykill með myndum af áverkunum. Hann er í bleikum kassa undir rúminu mínu.“
Skrifaði hún í dagbókina. Þar segir hún einnig að hún hafi ekki getað verið með vinum sínum eða farið í vinnu eða skóla án þess að unnustinn yrði viðskotaillur. Dagbókin er eitt þeirra sönnunargagna sem saksóknari leggur fyrir réttinn.
Lík Tova fannst tveimur dögum eftir að tilkynnt var um hvarf hennar. Miklir áverkar voru á líkinu en hún hafði verið slegin að minnsta kosti 20 öflugum höggum með hamri, bæði í höfuðið og líkamann. Síðan var hún kyrkt.
Unnustinn neitar að hafa myrt hana en viðurkennir að hafa beitt hana ofbeldi.
Sambandi Tova og unnustans lauk í mars. Þá kærði hún hann til lögreglunnar fyrir ofbeldi og skýrði frá því að myndir væru til. Hún vildi að sögn ekki gera líf hans að „helvíti“ og vildi því ekki aðstoða frekar við rannsókn málsins eftir því sem segir í dómsskjölum.