Karlmaður ákærður fyrir manndráp af gáleysi: Ók of hratt undir áhrifum lyfja

Mynd: Mynd: DV

Karlmaður á fimmtugsaldri hefur verið ákærður fyrir manndráp af gáleysi en hann er sakaður um að hafa valdið dauða karlmanns á sjötugsaldri með akstri sínum. Maðurinn er sakaður um að hafa valdið banaslysi en hann er sagður hafa ekið á allt að 162 kílómetrahraða á klukkustund undir áhrifum deyfandi lyfseðilsskyldum lyfjum.

RÚV greinir frá þessu. Slysið átti sér stað á Öxnadalsheiði í júní í fyrra. Þá var greint frá því að slysið hafi orðið með þeim hætti að ein bifreið var að taka fram úr annarri bifreið í þann mund sem lítil fólksflutningabifreið kom á móti.

Afleiðingarnar urðu þær að bifreiðin sem var að taka fram úr valt út af veginum en árekstur varð með hinum tveimur. Í rútunni voru 12 farþegar auk bílstjóra, í annarri bifreiðinni voru tveir aðilar og einn í hinni. Slysið var mjög alvarlegt og lést ökumaður annarrar bifreiðarinnar í slysinu sem fyrr segir.

Í frétt RÚV segir enn fremur að auk þessa að aka undir áhrifum lyfja var bifreið mannsins ekki í notkunarhæfu ástandi, með bremsubúnað í ólestri og án lögboðinna ökuljósa. Málið var þingfest í Héraðsdómi Norðurlands eystra í morgun.

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.