Egill Helgason fjallar um nýjustu vendingar í stjórnmálum hér á landi. Nú er ljóst að Guðni Th. Jóhannesson forseti Íslands hefur ákveðið að veita Katrínu Jakobsdóttur formanni Vinstri grænna umboð til stjórnarmyndunar. Þeir flokkar sem nú stefna á að mynda ríkisstjórn eru Samfylking, Framsóknarflokkurinn, Píratar og Vg. Katrín vill að jafnréttismál og loftslagsmál verði í öndvegi.
Egill Helgason skrifar um tíðindi dagsins á Eyjuna og deilir þeim skrifum á Facebook. Þar segir Egill:
„Ætla ekki að klúðra með kjaftagangi eins og síðast.“
Í greininni á Eyjunni bendir Egill á að leiðtogar flokkanna hafi haldið spilum þétt að sér og leynd ríkt yfir viðræðunum.
„Katrín Jakobsdóttir fer á Bessastaði og sækir umboð til þess að vinna að myndun ríkisstjórnar Vinstri grænna, Framsóknar, Samfylkingar og Pírata, Guðni Th Jóhannesson veitir henni það. Þeir sem hafa tekið þátt í viðræðunum hafa passað að ekkert leki út – væntanlega minnugir þess hvernig allt lak út í kringum kosningarnar 2016. Þá var allt sem rætt var komið í fjölmiðla stuttu eftir að fundum lauk – bæði fyrir og eftir kosningar – og stórskaðaði allt ferlið.“
Vill Egill meina að þagnarhjúpurinn bendi til þess að viðræðurnar séu á alvarlegra stigi en fyrir ári. Nú virðist ríkja meiri trúnaður á milli flokkanna. Egil sér ýmis hættumerki sem gætu orðið stjórninni að falli fari svo að hún verði að veruleika. Egill segir:
„Hins vegar er þetta viðkvæmt. Flokkarnir fjórir hafa ekki nema eins manns meirihluta á þingi. Það getur reynst ansi erfitt nema samstaðan sé þeim mun meiri. Þá þarf að aftengja ýmis erfið mál svo að þau valdi ekki stjórnarslitum. Landbúnaðarmálin, Evrópumálin, stjórnarskrána, sjávarútvegsmálin.“
Segir Egill að í öllum þessum málum sé hætta á að ágreiningur geti komið upp á milli flokkanna og það gæti útheimt stórar málamiðlanir.
„En svo er aldrei hægt að koma í veg fyrir óvæntar uppákomur eins og þá sem varð valdandi að falli síðustu stjórnar. Afdrif Bjartrar framtíðar eru þó líklega víti til varnaðar.“
Þá telur Egill að verði stjórnin stofnuð með þessum nauma meirihluta en aðeins munar einum manni. Margir munu spá stjórninni falli. Stjórnarandstaðan yrði með þaulvana þingmenn í fararbroddi, þá Bjarna Benediktsson og Sigmund Davíð Gunnlaugsson. Bendir Egill á að sama gæti gerst hjá síðustu vinstri stjórn á árunum 2009 til 2013 þegar stöðugt kvarnaðist úr stjórninni. Annar möguleiki til að leysa það væri þessi að mati Egils:
„Það er náttúrlega möguleiki að flokkarnir fjórir fái til liðs við sig Flokk fólksins eða Viðreisn ellegar reyni að tryggja einhvers konar hlutleysi frá öðrum hvorum þessara flokka.“
