Klukkan hálfsex í morgun var maður handtekinn vegna gruns um innbrot inn í læst rými í húsnæði Landspítalans-Háskólasjúkrahúss í Fossvogi. Hafði maðurinn m.a. veist að öryggisverði skömmu áður en lögreglan kom á vettvang. Maðurinn var vistaður í fangaklefa.
Þetta kemur fram í Dagbók lögreglunnar og enn fremur þetta:
Klukkan tíu í morgun var tilkynnt um innbrot og þjófnað úr bifreið í hverfi 108. Var m.a. fartölvu stolið úr bifreiðinni. Nokkru síðar var tilkynnt um karlmann í annarlegu ástandi í hverfi 110. Var hann með blæðandi skurði á fingrum haldandi á fartölvu. Viðurkenndi hann innbrotið þegar lögreglan kom á vettvang og var hann því vistaður í fangaklefa í framhaldinu eftir að búið var að gera að sárum hans.
Um svipað leyti í morugn var tilkynnt um umferðaróhapp á Bústaðavegi en þar hafði m.a. bifreið hafnað á hvolfi. Enginn meiddist við óhappið.
Klukkan hálfellefu í morgun var tilkynnt um eignaspjöll á bíll í Kópavogi. Þar hafði verið brotin rúða í bifreiðinni og eitthvað af verðmætum stolið úr henni. Karlmaður var handtekinn stuttu síðar grunaður um verknaðinn. Var hann í annarlegu ástandi og því vistaður í fangaklefa.