Fimm konur, sem allar tengjast kirkjunni nánum böndum, hafa kært séra Ólaf Jóhannsson, sóknarprest í Grensáskirkju, til úrskurðarnefndar þjóðkirkjunnar um meðferð kynferðisbrota.
Fréttablaðið greinir frá þessu í dag.
Þar kemur fram að konurnar hafi sent bréf til Agnesar M. Sigurðardóttur biskups sem las bréfið á kirkjuþingi í gær.
Konurnar sem um ræðir: Anna Sigríður Helgadóttir, söngkona og fyrrverandi tónlistarstjóri Fríkirkjunnar í Reykjavík, Elín Sigrún Jónsdóttir, framkvæmdastjóri Útfararstofu kirkjugarðanna, Guðbjörg Ingólfsdóttir, starfsmaður Kirkjuhúss, séra Guðný Hallgrímsdóttir, prestur fatlaðra með starfsstöð í Grensáskirkju og Rósa Kristjánsdóttir, djákni og deildarstjóri sálgæslu á Landspítala.
Að því er Fréttablaðið greinir frá segjast konurnar bera fullt traust til úrskurðarnefndar kirkjunnar.
Um helgina var greint frá bréfi sem lögmaður séra Ólafs, Einar Gautur Steingrímsson, sendi Agnesi vegna ákvörðunar hennar um að senda Ólaf í leyfi í sumar. Þar var Agnes borin þungum sökum og sökuð um að fara gegn lögum og byggja á slúðri og dylgjum við ákvörðun sína um að senda Ólaf í leyfi.
Konurnar fimm vilja meina að í bréfi lögmannsins sé gert lítið úr þeim brotum sem séra Ólafur er sakaður um.