Brynjar hættur á Facebook af heilsufarsástæðum: „Ég mun örugglega sakna ykkar“

Brynjar Níelsson þingmaður Sjálfstæðisflokksins hefur af heilsufarsástæðum tekið þá ákvörðun að hætta á Facebook. Þetta tilkynnti hann á samskiptamiðlinum nú rétt í þessu. Brynjar hefur farið mikinn á Facebook frá árinu 2012 og oft verið fjörugar umræður á Facebook-síðu hans. En nú hefur Brynjar tekið ákvörðun og ætlar að segja skilið við samskiptamiðilinn. Brynjar segir:

„Áður en ég hóf afskipti af stjórnmálum haustið 2012 var ég ekki á samskiptamiðlum og leið bara fjandi vel. Mér var hins vegar tjáð að ekki þýddi að fara í stjórnmál án þess að vera á fésbókinni, hið minnsta. Fésbókin er kjörinn vettvangur til að koma áleiðis skoðunum sínum. Mér þykir vænt um alla 5000 vini mína og líka hina sem eru í mismiklu jafnvægi en hafa mikla þörf til að segja mér til syndanna.“

Brynjar segir samskipti á samfélagsmiðlinum vandmeðfarin. Kímnigáfa og skopskyn fólks mismunandi og sumir beri lítið skynbragð á kaldhæðni.

„Viðbrögðin geta því verið ansi harkaleg og jafnvel ógeðfelld. Einn góður vinur minn sagði að ég gæti lagað það að mestu með því að læra að nota alla þessa bros-og skeifukarla sem í boði eru.“

Brynjar telur að samskiptamiðlar hafi slæm áhrif á geð þjóðarinnar.

„Sýnist að fólk sé að mestu hætt að tala saman og einu samskiptin eru þegar verið er að sýna hvort öðru eitthvað í símanum. Kannski ekki skrítið að geðheilbrigðimál sé mesta áskorun stjórnmálanna í nánustu framtíð.“

Bætir Brynjar við að hann ætli að kveðja Facebook af heilsufarsástæðum. Hann útilokar þó ekki að snúa aftur síðar.

„Eiginkonan mun gleðjast og kannski láta sjá sig aftur á meðal fólks og margir samflokksmenn mínir munu draga úr notkun róandi lyfja ef það er ekki orðið of seint. Kannski mun hin magnaða pólitíska hreyfing Pírata ná áttum. Kraftaverkin gerast," segir Brynjar og bætir við að lokum:

„Ég mun örugglega sakna ykkar, kæru vinir en nú bíð ég bara eftir að einhver kenni mér að loka þessum fjanda.“

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.