Dómstóll í Alabama í Bandaríkjunum hefur dæmt verslunarrisann Walmart til að greiða 59 ára karlmanni, Henry Walker, 7,5 milljónir dala, tæplega 800 milljónir króna, í bætur vegna slyss sem hann varð fyrir í verslun Walmart sumarið 2015.

Forsaga málsins er sú að Walker var að teygja sig eftir vatnsmelónu á vörubretti í fyrirtækinu. Hann festi fótinn í brettinu sem varð til þess að hann datt illa og mjaðmagrindarbrotnaði.

Meiðslin voru slæm og þarf Walker að notast við göngugrind eftir slysið. Hann stefndi fyrirtækinu eftir slysið og í vikunni komst dómstóll að niðurstöðu í málinu. Walmart skal greiða Walker sem nemur tæpum 800 milljónum króna vegna slyssins.

Að sögn dómara hefði starfsfólk Walmart átt að ganga þannig frá brettinu að slys, líkt og það sem Walker varð fyrir, gæti ekki átt sér stað. Lögmenn Walmart reyndu að færa rök fyrir því að Walker hafi sjálfur sýnt gáleysi þegar hann teygði sig eftir melónunni. Fyrirtækið hyggst áfrýja dómnum.