Ásmundur Friðriksson, þingmaður Sjálfstæðisflokksins, er hættur sem varastórsír Oddfellowreglunnar. Þetta kemur fram í fréttatilkynningu frá samtökunum.
„Á fundi stjórnar Stórstúkunnar 1. nóvember 2017, lagði hvl. varastórsír, Ásmundur Friðriksson fram ósk um að láta af embætti varastórsírs Oddfellowreglunnar af persónulegum ástæðum. Stjórn Stórstúkunnar hefur orðið við ósk hans og veitt honum lausn frá embætti. Stjórn Stórstúkunnar þakkar br. Ásmundi áralangt gott samstarf,“ segir í tilkynningunni.
Mikið hefur gengið á hjá Ásmundi í dag en hann neitaði að greina Fréttablaðinu frá hversu háar upphæðir hann fengi greiddar frá ríkinu vegna starfa sinna sem þingmaður en þingmenn geta haldið akstursdagbækur og fengið endurgreiddan ýmis kostnað. Athugun Fréttablaðsins leiðir í ljós að þingmenn í Suðurkjördæmi, kjördæmi Ásmundar hafa fengið mun hærri endurgreiðslur en aðrir þingmenn.
Ásmundur kveðst fara eftir lögum og reglum og enginn hafi gert athugasemdir hvernig hann hafi notað sinn bíl. Sveinn Arnarsson blaðamaður Fréttablaðsins spurði þá hvort Ásmundur væri til í að upplýsa hversu mikið hann hefði ekið og hvað upphæðin hefði verið há. Við því vildi þingmaðurinn ekki verða og spurði á móti: „Þið eruð ekki að spyrja hvað lögfræðingarnir frá Rauða krossinum eru að fá fyrir að senda bréf til innanríkisráðuneytisins vegna hælisleitenda, er það? Þið viljið ekki að þeir missi spón úr aski sínum?“