Abby Lynn Patterson sást síðast þann 5. september
Aðstandendur tvítugrar stúlku, Abby Lynn Patterson, vona að stúlkan skili sér heil heim en rúmur mánuður er síðan hún hvarf sporlaust frá heimili sínu í Lumberton í New York-ríki.
Hvarf Abby þykir sérstaklega óhugnanlegt í ljósi þess að fyrr á þessu ári fundust þrjár ungar konur látnar í bænum sem telur rétt rúmlega tuttugu þúsund íbúa.
Þann 18. Apríl síðastliðinn fannst Christina Bennett, 32 ára látin í yfirgefnu húsi og stuttu síðar fannst lík 36 ára konu, Rhondu Jones, í ruslagámi. Það var svo þann 3. júní að lík þriðju konunnar, hinnar 28 ára Megan Oxendine, fannst. Skömmu áður en hún fannst látin hafði hún tjáð sig í sjónvarpsviðtali um dauða Rhondu.
Lögregla hefur ekki gefið út hvernig konurnar þrjár létust og segir lögregla að ekki liggi fyrir hvort tengsl séu á milli þessara þriggja dauðsfalla. Í ljósi þess að um lítinn bæ er að ræða, þá staðreynd að konurnar fundust með skömmu millibili og voru á svipuðu aldursreki hafa einhverjir spurt sig hvort raðmorðingi gangi laus.
Abby sást síðan þann 5. september en þá sagðist hún þurfa að skjótast og reiknaði með að verða í burtu í klukkutíma. Þegar hún skilaði sér ekki heim reyndi móðir hennar að hringja í hana en þá var búið að slökkva á farsímanum. Lögregla telur ekki að tengsl séu á milli hvarfs Abby og dauðsfalla hinna þriggja kvennanna en útilokar það þó ekki.