Starfsmenn sitja eftir með sárt ennið – Væntanlegur kaupandi segist svikinn
Í vikunni var greint frá því að Okkar bakarí ehf., sem rekur þrjú bakarí, tvö í Garðabæ og eitt í Hafnarfirði, hefði verið tekið til gjaldþrotaskipta. Eigandi fyrirtækisins er Jón Heiðar Ríkharðsson en hann keypti og tók við blómlegum rekstri fyrirtækisins árið 2012. Síðan þá hefur smátt og smátt hallað undan fæti í rekstrinum og hefur gæðum, úrvali og þjónustu hrakað mjög undanfarna mánuði. Fjölmargt starfsfólk situr uppi með sárt ennið eftir gjaldþrotið. Þá telur Jarek Kuczynski, sem á og rekur Hverafold bakarí, sig hafa verið illa svikinn í viðskiptum sínum við Jón Heiðar. Hann hafði skrifað undir samning um kaup á fyrirtækinu skömmu fyrir gjaldþrotið. Hann hafi þegar byrjað að reyna að laga reksturinn og farið í talsverð fjárútlát til þess. Viku síðar hafi lögfræðingur Jóns Heiðars tilkynnt honum að fyrirtækið yrði selt til samkeppnisaðila. „Þetta er algjört rugl. Ég skil ekki hvernig er hægt að hegða sér á þennan hátt í viðskiptum,“ segir Jarek í samtali við DV.
Okkar bakarí var tekið til gjaldþrotaskipta þann 26. september síðastliðinn og verður skiptafundur haldinn þann 19. desember. Rekstrinum hafði hrakað hratt undanfarin misseri og aðdragandi gjaldþrotsins virðist hafa verið farsakenndur í meira lagi. Starfsfólk situr eftir með sárt ennið. „Það var orðið erfitt að fá vörur til að selja. Allt bakkelsið var bakað í versluninni í Iðnbúð en tækin voru orðin lúin. Það sem kom til okkar var stundum hrátt eða brennt. Það er fjöldi eldri borgara hérna í nágrenninu sem voru fastir viðskiptavinir og þeim var farið að blöskra ástandið. Að lokum gáfust flestir upp á að versla við okkur,“ segir starfsmaður fyrirtækisins sem var staðsettur í útibúi bakarísins í Sjálandshverfi.
Að sögn starfsmannsins hafi flestir starfsmenn gefist upp og hætt undanfarna mánuði. „Það voru margir sem hættu 1. september enda fékk fólk ekki laun greidd. Bakararnir voru líka flestir horfnir til annarra starfa og það var aðallega treyst á nema í bakstrinum,“ segir starfsmaðurinn. Sem dæmi um slæmt ástand rekstursins hafði útibúið í Sjálandi ekki verið þrifið í marga mánuði. „Ástandið var enn verra í Iðnbúð. Þar var ógeðslega skítugt.“ Þá segir starfsmaðurinn að skömmu fyrir gjaldþrotið hafi ósáttur eigandi útkeyrslufyrirtækis mætt á útsölustaðina í Garðabæ og hreinsað út flestar vörurnar sem eftir voru í kælinum upp í skuld.
Að sögn starfsmannsins eru margir starfsmenn í fullkominni óvissu varðandi launagreiðslur. „Jón Heiðar skuldar mér septembermánuð en ég veit um marga starfsmenn sem eiga inni nokkurra mánaða laun. Þeir eru mjög sárir og reiðir vegna ástandsins og hafa flestir leitað til stéttarfélaga sinna. Við fengum engar upplýsingar frá eiganda fyrirtækisins um hvað væri yfirvofandi,“ segir starfsmaðurinn. Að lokum þurfti Jón Heiðar sjálfur að sinna afgreiðslu í bakaríinu í Iðnbúð enda höfðu allir starfsmenn yfirgefið skútuna.
Sá sem varð einna verst úti var Jarek Kuczynski, sem á og rekur Hverafold bakarí í Grafarvogi. Jarek hafði íhugað að kaupa fyrirtækið um nokkur skeið og það gekk í gegn skömmu fyrir gjaldþrotið, sem hann hafði ekki hugmynd um að væri yfirvofandi. „Okkar bakarí var eitt allra besta bakarí landsins. Það er það sem ég heyrði frá viðskiptavinum og starfsfólki,“ segir Jarek. Að hans sögn hafi rekstrinum hrakað hratt og hann hafi því séð gott tækifæri í að snúa rekstrinum við.
Hann komst að samkomulagi við Jón Heiðar um kaupverð og síðan var skrifað undir kaupsamning. „Á honum voru nokkrir fyrirvarar, meðal annars um fjármögnun. Ég fór beint í að tala við bankann og það gekk hratt og vel að fá vilyrði fyrir fjármögnun. Þegar samþykki bankans lá fyrir var kominn á kaupsamningur,“ segir Jarek. Hann sá að rekstrinum var að blæða út og hóf því þegar að reyna að koma fleyinu aftur á flot. „Ég pantaði vörur og hráefni frá birgjum mínum fyrir rúma milljón og kom með vörur úr mínu bakaríi til að selja,“ segir Jarek. Hann hafi þó fljótlega rekið sig á að tæki og tól Okkar bakarís voru ekki í því ástandi sem hann taldi. „Það var allt meira og minna ónýtt, meðal annars stór kæliskápur. Það var óviðunandi og því eyddi ég um 150 þúsund krónum í að gera við hann,“ segir Jarek.
Jarek taldi að kaupin væru frágengin og því kom honum gjörsamlega í opna skjöldu þegar lögfræðingur Jóns Heiðars tilkynnti honum um að Jón Heiðar hefði gert samning við annan kaupanda, Jón Arilíusson, sem er jafnan kenndur við Kökulist. Jarek hyggst leita réttar síns.
DV náði tali af Jóni Heiðari Ríkharðssyni en hann vildi ekki tjá sig um málið. Hann vísaði á skiptastjóra þrotabúsins, Jón Auðun Jónsson, varðandi frekari upplýsingar. „Það var ekki kominn á kaupsamningur á milli Hverafoldar bakarís og Okkar bakarís. Fyrir lá kauptilboð sem var bundið í tíma og hafði runnið út. Báðir aðilar voru því lausir allra mála þegar seinna tilboðið barst. Ég hef engan kaupsamning séð og enginn nefnt það við mig, hvorki Jón Heiðar, Jarek eða starfsmenn bankans, að slíkur samningur hafi verið gerður,“ segir Jón Auðunn í skriflegu svari til DV.
Hann segist ekki hafa komið að samkomulagi þessara aðila um rekstur bakarísins þessa síðustu daga fyrir þrot. „Ég þekki ekki efni þess en skilst að í megindráttum hafi það gengið út á að Jarek útvegaði birgðirnar og ábyrgðist laun starfsmanna en tæki jafnframt allar tekjur. Þetta voru bara örfáir dagar en tilboðið rann út 30. september,“ segir Jón Auðunn.
