Ítrekað kemur fyrir að hælisleitendur reyni að koma sér um borð í flutningaskip Eimskips á leið til Bandaríkjanna. Dæmi eru um að sömu einstaklingarnar geri til þess ítrekaðar tilraunir þar sem kærur skila engum árangri.

Þetta kom fram í kvöldfréttum RÚV. Þá kom einnig fram að meðal þeirra sem reynt hafa að smygla sér um borð er drengur undir lögaldri. Seinasta tilraun átti sér stað í gær þegar þrír hælisleitendur reyndu að komast um borð.

Samkvæmt Ólafi William Hand upplýsingafulltrúa Eimskips hefur öryggisgæsla verið efld sérstaklega við þau skip sem eru á leið vestur um haf. Þá bætti hann við að vegna þessara síendurteknu tilrauna væru starfsmenn Eimskips sífellt að sinna einhvers konar landamæraeftirliti en slíkt er skiljanlega ekki í þeirra verkahring.

Séu einstaklingarnir gripnir við að reyna að koma sér um borð eru þeir handteknir af lögreglu og kærðir. Eftir það er þeim sleppt og geta þá reynt það sama aftur. Ólafur gagnrýnir úrræðaleysi í málefnum hælisleitenda hér á landi.

„Ef þeir eru að reyna að komast um borð í skip sem er á leið vestur um haf þá eru þeir búnir að sýna það í verki að þeir vilja ekki vera þarna og þá eigum við bara að senda þá úr landi.“