Tuttugu og sjö ára rafvirki frá Skotlandi hefur verið dæmdur í þriggja mánaða fangelsi í Dúbaí í Sameinuðu arabísku furstadæmunum.
Fjallað var um málið hér á landi, en maðurinn, rafvirkinn Jamie Harron, komst í kast við lögin fyrir litlar sakir.
Forsaga málsins er sú að Jamie var staddur á kaffihúsi í Dúbaí þann 15. júlí. Hann var á leið til Afganistans starfs síns vegna en millilenti í Dúbaí þar sem hann fór á kaffihús til að drepa tíma.
Í frétt BBC, sem fjallaði um málið á dögunum, kemur fram að nokkuð fjölmennt hafi verið á kaffihúsinu og til að forðast það að hella kaffinu niður varð Jamie það á að snerta annan karlmann. Hann var að fikra sig fram hjá fólki þegar hann lagði höndina á mitti mannsins sem brást ókvæða við.
Til að gera langa sögu stutta var lögregla kölluð til og var Jamie handtekinn. Hann sat í fangelsi í fimm daga og var vegabréf hans tekið af honum meðan dómstólar unnu úr málinu. Nú, tæpum þremur mánuðum síðar, er dómur fallinn og hefur Jamie verið dæmdur í þriggja mánaða fangelsi.
Mannréttindasamtök, Detained in Dubai, létu sig málið varða og reyndu þau að þrýsta á yfirvöld í Dúbaí til að leyfa Jamie að yfirgefa landið. Hann var úrskurðaður í farbann eftir að málið kom upp og þurfti að standa straum sjálfur af kostnaði við að gista á hótelum.
Samtökin segja að dómnum verði að líkindum áfrýjað.