Lögreglan í Texas tilkynnti í morgun að lík hefði fundist við leit að þriggja ára stúlku, Sherin Mathews, sem saknað hefur verið í hálfan mánuð.

Málið þykir óhugnanlegt enda var stúlkan send út klukkan þrjú um nótt í refsingarskyni fyrir að haga sér illa. Fjölmennt leitarlið hefur leitað að Sherin undanfarnar tvær vikur, eða frá 7. október þegar hún hvarf.

Lögregla hefur ekki staðfest að líkið sem fannst sé af Sherin en tilkynnti þó að hún hefði enga ástæðu til að ætla að svo væri ekki. Líkið fannst í undirgöngum skammt frá heimili fjölskyldunnar, en vitað er sléttuúlfar halda til á svæðinu.

Faðir hennar, Wesley Mathews, hefur verið handtekinn vegna málsins. Hann tjáði lögreglu að hann hafi sent stúlkuna út, farið að þvo þvott og þegar hann fór að athuga með hana stundarfjórðungi síðar var hún horfin. Hann tilkynnti um hvarfið fimm klukkustundum síðar.

Sherin var ættleidd frá munaðarleysingjaheimili á Indlandi fyrir tveimur árum. Stúlkan glímdi við væga þroskaskerðingu og sagðist Wesley hafa brugðist illa við þegar hún vildi ekki drekka mjólk sem hann hafði látið hana fá.

Móðir Sherin var sofandi þegar atvikið átti sér stað, að því er talið er. Hjónin eiga fjögurra ára dóttur fyrir og hefur henni verið komið fyrir hjá félagsmálayfirvöldum meðan rannsókn á málinu stendur yfir.