Ahmadreza Djalali, læknir og vísindamaður við Karólínska sjúkrahúsið í Svíþjóð, hefur verið dæmdur til dauða í Íran. Djalali þessi var handtekinn í apríl 2016 og sakaður um guðlast og njósnir.
Djalali er með ótímabundið dvalarleyfi í Svíþjóð en þangað fluttist hann ásamt fjölskyldu sinni, konu og tveimur börnum, fyrir mörgum árum. Hann starfaði við rannsóknir á Karólínska sjúkrahúsinu í Stokkhólmi.
Lina Eidmark, fulltrúi hjá sænska utanríkisráðuneytinu, sagði í samtali við TT í Svíþjóð að samkvæmt upplýsingum hefði Djalali hlotið dauðadóm í heimalandi sínu. Unnið væri að því að fá endanlega staðfestingu þess efnis.
Djalali er sem fyrr segir með ótímabundið dvalarleyfi í Svíþjóð en er ekki sænskur ríkisborgari. Það gerir sænskum yfirvöldum erfitt fyrir í málinu en þó segir Lina að sænsk yfirvöld muni reyna eftir fremsta megni að aðstoða Djalali.