Inga Sæland, formaður Flokks fólksins, biðst formlega afsökunar á að hafa notað ljósmynd þar sem af listaverkið Sólfar var í forgrunni á haustþingi flokksins. Hún segir að engin ráðagerð hafi búið að baki um að brjóta gegn höfundarrétti á listaverkinu.
Þetta kemur fram í fréttatilkynningu frá flokknum. „Þessi notkun á ljósmyndinni þar sem Sólfarið birtist var gerð í góðri trú. Var ljósmyndinni einungis ætlað að sýna fagra haustmynd með tignarlegt útilistaverk í forgrunni. Engin ráðagerð bjó að baki um að brjóta gegn höfundarrétti á listaverkinu. Flokki fólksins er ljúft og skylt að biðjast afsökunar á þeim leiðu mistökum að hafa ekki leitað samþykkis rétthafa höfundarréttar að listaverkinu Sólfar eftir Jón Gunnar Árnason. Sólfarið hefur verið fjölmörgu fólki aðdáunarefni enda ber það vitni um stórbrotinn listamann,“ segir í tilkynningu.