Laust fyrir klukkan ellefu í gærkvöld handtók lögreglan konu í Hafnarfirði vegna gruns um heimilisofbeldi. Var konan vistuð í fangaklefa í þágu rannsóknar málsins en ekki er vitað meira um málið.
Þetta kemur fram í Dagbók lögreglunnar en þar segir einnig frá því að kl. 00:50 í nótt var maður handtekinn í Spönginni, grunaður um líkamsárás. Maðurinn hótaði einnig lögreglumönnum og var vistaður í fangaklefa. Á sama stað var annar maður handtekinn fyrir að tálma störf lögreglu og var hann einnig vistaður í fangaklefa.
Rétt fyrir klukkan átta í gærkvöld var tilkynnt um eld í ruslageymslu fjölbýlishúss í austurborginni. Reyndist eldurinn vera minniháttar og slökkti slökkvilið hann greiðlega.
Laust eftir klukkan eitt í nótt var tilkynnt um innbrot í húsnæði Tjaldsvæðisins í Laugardal. Ekkert frekar er vitað um málið.
Nokkuð var um ölvunarakstur í nótt, minniháttar umferðaróhöpp og tilvik þar sem lögregla stöðvaði réttindalausa ökumenn.