Í bænum Eislingen í Suður-Þýskalandi fann kona í gær þrjú lík í BMW-bifreið. Hinn hryllilegi líkfundur átti sér stað í bílakjallara. Ekki löngu eftir að lögregla kom á vettvang voru borin kennsl á hin látnu. Þetta voru þau Cornelia Jehle, 56 ára gömul, þekkt stjórnmálakona í flokknum Frjálsir demókratar (FDP), 26 ára gamall elskhugi hennar og 56 ára gamall eiginmaður Corneliu, Markus Jehle, en þau höfðu slitið samvistum.
Cornelia og ástmaður hennar höfðu verið skorin á háls með eldhúshníf en lík þeirra voru í framsætinu. Líkið af Markus var í aftursætinu og voru á því fjölmörg skotsár. Ekki er fullsannað hver skaut hann en mestar líkur eru taldar á sjálfsmorði og allt bendir til þess að hann hafi myrt eiginkonu sína og ástmann hennar.
Fólkið hafði áður komið við sögu lögreglu vegna áreitni Markusar í garð Corneliu og ástmanns en hann er sagður ekki hafa getað sætt sig við skilnaðinn og samband hennar við unga manninn. Hafði Cornelia fengið úrskurðað nálgunarbann á hann.
Markus er sagður hafa skilið eftir sig bréf sem er í vörslu lögreglunnar og hefur efni þess ekki verið gert opinbert.