Egill Helgason, fjölmiðlamaður og stjórnmálarýnir, telur að Framsóknarflokkur og Viðreisn kunni að vera í oddastöðu við stjórnarmyndun eftir kosningar þó að flokkarnir hljóti lítið fylgi. Egill telur að draumur Sjálfstæðisflokksins um að komast í stjórn sé fjarlægur en að einnig verði örðugt að mynda vinstri stjórn VG, Samfylkingar og Pírata, þar sem meirihlutinn verði annaðhvort naumur eða ekki fyrir hendi.

Þetta kemur fram í pistli Egils á Eyjunni. Um möguleikann á samstarfi VG og Sjálfstæðisflokksins skrifar Egill:

Eina von Sjálfstæðisflokksins um að komast í ríkisstjórn er að Vinstri græn fari með honum. Það er fjarlægur draumur – og enn fjarlægari eftir lögbannið sem sett var á Stundina og fréttaflutninginn af Bjarna Benediktssyni í blaðinu. Katrín Jakobsdóttir og Bjarni Benediktsson eru í ágætu sambandi en hún getur varla tekið þá áhættu að stuttu eftir að hún myndar ríkisstjórn með honum fari að birtast fleiri fréttir af fjármálavafstri hans.

Í baklandi VG í Reykjavík er fullkomin andstaða gegn því að fara í stjórn með Sjálfstæðisflokki, þótt önnur viðhorf kunni að vera uppi úti á landi.

Af þessu dregur Egill eftirfarandi ályktun:

Þetta veldur því að tveir litlir flokkar verða máski í oddastöðu eftir kosningarnar. Bæði Framsóknarflokkur og Viðreisn eiga eftir að tapa illa og ná kannski ekki nema fáum mönnum inn á þing. En tilurð ríkisstjórnar gæti oltið á öðrum hvorum flokknum.

Hvor þeirra er tilbúinn að fara í ríkisstjórn undir forsæti Kötu Jak?