Tvö börn eru látin og 10 fjölskyldumeðlimir þeirra liggja á sjúkrahúsum, sumir þungt haldnir, eftir að hafa orðið fyrir skæðri eitrun. Beðið var um aðstoð sjúkrabíls að húsi í bænum Haslev á Sjálandi klukkan 11.45 í gær. Þegar sjúkraflutningsmenn komu á vettvang var 15 ára unglingur illa haldinn og átti erfitt með andardrátt. Skömmu síðar var ljóst að mun fleiri voru veikir og var því allt tiltækt björgunarlið kallað út og stórslysaáætlanir virkjaðar á fimm sjúkrahúsum á Sjálandi.
Fjögur börn voru með alvarleg eitrunareinkenni og beita þurfti endurlífgun á tvö þeirra. Fólkið var flutt í skyndingu á sjúkrahús í Køge, Slagelse og Hróarskeldu og voru 11 sjúkrabílar notaðir við flutninga. Síðdegis í gær var allt fólkið flutt á ríkisspítalann í Kaupmannahöfn, þar af voru fimm börn flutt í þyrlum.
Á fréttamannafundi lögreglunnar í gær kom fram að ekki sé vitað með vissu hvað gerðist en grunur leiki á að fólkið hafi borðað baneitraða sveppi. Fólkið var með mikil eitrunareinkenni. Getgátur hafa verið uppi um að fólkið hafi notað sveppi, sem það tíndi í nálægum görðum, við matseld og hafi ekki gætt að því að einhverjir sveppanna eru baneitraðir. Fjölskyldan býr í móttökustöð flóttamanna í Haslev en fólkið er frá Kongó en hefur verið í Danmörku um nokkra hríð.
