Hugsanlega mun Norður-Kórea, í þeirri mynd sem samfélagið er byggt upp í dag, líða undir lok innan árs. Þetta segir Ri Jong-ho, landflótta Norður-Kóreumaður sem var háttsettur innan stjórnkerfisins, um stöðuna sem nú er uppi. Hann segir að efnahagsþvinganir Bandaríkjanna geti valdið þessu hruni.
Jong-ho stýrði alþjóðlegum fyrirtækjum Norður-Kóreustjórnar sem sáu um að útvega þessu harðlokaða einræðisríki peninga. Þetta kom fram í máli hans á fundi Asia Society í New York nýlega. Independent skýrir frá þessu. Þar segir að Jong-ho hafi einnig sagt að Norður-Kórea vilji gjarnan eiga í samskiptum við Bandaríkin.
„Refsiaðgerðir Hvíta hússins gagnvart Norður-Kóreu eru sögulegar. Landið hefur aldrei áður sætt svo hörðum refsiaðgerðum. Ég er ekki viss um að Norður-Kórea geti lifað af eitt ár með þessum refsiaðgerðum. Fólk mun deyja.“´
Sagði hann á fundinum. Hann sagðist telja að sífelldar ögranir Norður-Kóreu og orðaskak Kim Jong-un, einræðisherra, gagnvart Bandaríkjunum sé tilraun stjórnvalda til að koma á diplómatískum samskiptum við Bandaríkin án aðkomu Suður-Kóreu.
„Núna hafa leiðtogar Norður-Kóreu komið fyrir eldflaugum sem er miðað á Bandaríkin og halda áfram ögrunum sínum en þeir eru örvæntingarfullir og vilja samskipti við Bandaríkin.“
Hann sagði einnig að samskipti Norður-Kóreu og Kína væru nú svo slæm að þau hefðu aldrei verið eins slæm. Kim Jong-un hefði reiðst heiftarlega þegar Xi Jinping, forseti Kína, fór í opinbera heimsókn til Suður-Kóreu 2014 og hefði þar með tekið Suður-Kóreu fram fyrir Norður-Kóreu. Jong-ho sagði að Jong-un hefði reiðst heiftarlega og hefði meðal annars kallað Xi Jinping „tíkarson“ á fundi með háttsettum embættismönnum.
Jong-ho flúði frá Norður-Kóreu með fjölskyldu sína 2014 en fram að því stýrði hann Korea Daehung Trading Corporation sem er undir beinni stjórn Kim-fjölskyldunnar, sem fer með völdin í landinu, eftir því sem South China Morning Post segir. Í samtali við The Washington Post sagði Jong-ho að hann hafi stýrt aðgerðum Norður-Kóreu til að fara framhjá refsiaðgerðum SÞ.