„Hvers vegna er ég teiknaður sem mannæta í skopmynd Morgunblaðsins í dag?“ að þessu spyr Jón Trausti Reynisson annar ritstjóri Stundarinnar. Hann gagnrýnir mynd sem skopmyndateiknarinn Helgi Sig teiknaði. Þar má sjá forsætisráðherra bundinn ofan í potti. Á pottinum stendur Stundin. Það kraumar í pottinum, það er verið að sjóða Bjarna Ben lifandi og Jón Trausti er villimannslegur þar sem hann stígur dans í kringum forsætisráðherra. Jón Trausti heldur á hristu sem á stendur Glitnislekinn. Í vinstri hönd má sjá penna og á honum stendur: Tilgangurinn og meðalið. Þá heitir myndin sjálf:
„Sært upp úr uppskrift frumstæðra tilfinninga.“
Jón Trausti er ekki hrifinn af skopmynd Helga. Eftir að hafa spurt af hverju hann sé teiknaður eins og mannæta heldur hann áfram:
„Er það vegna þess að ég er annar tveggja ritstjóra lítils fjölmiðils sem hefur birt umfjallanir þriggja öflugra rannsóknarblaðamanna um árekstur milli almanna- og einkahagsmuna í starfi kjörins fulltrúa, sem nú er forsætisráðherra, og sýnt fram á að viðkomandi hefur fært fram ósannar og villandi skýringar til almennings fram að þessu?“
Jón Trausti segir að mögulega væri hægt að sjá glens í myndinni. Jón heldur hins vegar fram að um sé að ræða samfellda tilraun til að teikna upp brjálæðislegan veruleika á forsendum valdhafanna líkt og hann orðar það.
„ …. þar sem fólk sem er flokkað sem óvinir er afskræmt og því eignaðar lágkúrulegar hvatir. Sami skopmyndateiknari hefur teiknað grínmynd af fjölda flóttamanna að drukkna í blóðbaði.“
Þá bendir Jón Trausti á að við hlið myndarinnar er hinn nafnlausi skoðanadálkur Staksteinar. Segir Jón að þar sé gert lítið úr fulltrúa Öryggis- og samvinnustofnunar Evrópu. En ÖSE hefur beint því til stjórnvalda að afnema bann við umfjöllun um Bjarna Benediktsson. Jón Trausti segir:
„Þetta er hluti af því að framleiða veruleika. Þar eru einstakir einstaklingar með lágkúrulegar hvatir að ráðast gegn siðmenntuðum mönnum. Það er villimennska að sýna fram á að formaður flokksins komi sér í aðstæður hagsmunaáreksturs og segi ósatt um það. Innan þessa ramma verður valdbeiting gegn villimönnunum sjálfsögð og eðlileg.“