Öflug sprenging varð við lögreglustöðina í Helsingjaborg á Skáni í Svíþjóð klukkan 00.20 að staðartíma í nótt. Miklar skemmdir urðu á lögreglustöðinni og nærliggjandi húsum. Lögreglan er með mikinn viðbúnað í bænum og hefur sett upp vegartálma en enginn hefur enn verið handtekinn vegna málsins.
Ekki er enn ljóst hvað olli sprengingunni en sérfræðingar lögreglunnar eru nú að rannsaka vettvanginn en stóru svæði í kringum lögreglustöðina hefur verið lokað af. Sænska TT-fréttastofan segir að mikið tjón hafi orðið í sprengingunni, anddyri lögreglustöðvarinnar sé ónýtt og að margar rúður hafi brotnað í lögreglustöðinni og nærliggjandi byggingum.
Enginn eldur kom upp en mikinn reyk lagði frá sprengingunni. Lögreglunni höfðu ekki borist neinar hótanir. Helsingborgs Dagblad hefur eftir nágrönnum að hús í nágrenninu hafi skolfið við sprenginguna, svo öflug hafi hún verið.
