Össur Skarphéðinsson segir að aðstæður hafi skapast fyrir Samfylkinguna að krefjast þjóðaratkvæðagreiðslu um ESB-aðild sem skilyrði fyrir stjórnarþátttöku. Fyrir þessu eru að hans mati tvíþættar aðstæður: Annars vegar sýnir skoðanakönnun að meirihluti kjósenda VG vill ganga inn í ESB. Hins vegar er Samfylkingin á blússandi uppleið í skoðanakönnunum þannig að ekki verður hægt að ganga framhjá flokknum við myndum vinstri stjórnar.
Þetta kemur fram í nýjum pistli Össurar á Facebook. Þar lýsir hann yfir þeirri skoðun sinni að forysta VG hafi aldrei verið í takt við hinn almenna kjósanda flokksins í Evrópumálum:
Í reglulegum skoðanakönnunum sem gerðar voru á síðasta áratug birtist fyrst meirihluti fyrir umsókn í hópi kjósenda VG. Þar birtist líka fyrst meirihluti við að taka upp evruna.
Það má líka rifja upp að árið 2013 flutti Katrín Jakobsdóttir og forysta VG tillögu á landsfundi sem efnislega fól í sér að öllu tilhugalífi við ESB yrði hætt. Tillaga forystu VG féll. Viti borið fólk á landsfundi VG tók völdin af Katrínu og Steingrími J.
Hin dapurlega staðreynd er sú að forysta VG hefur alltaf verið úr takti við almenna flokksmenn VG varðandi ESB.
Sjá einnig: Stuðningur eykst við inngöngu Íslands í ESB
Össur segir að Katrín hafi opnað á möguleikann á nýrri aðildarumsókn í sjónvarpsviðtali um daginn en stórfréttin í því viðtali hafi farið framhjá flestum:
Katrín staðfesti það rækilega í formannaþætti á dögunum, þar sem hún sagðist ekki vilja ganga í ESB. Þar er hún semsagt á annarri línu en meirihluti kjósenda hennar skv. nýju könnuninni. Það voru sosum engar fréttir.
En mikil tíðindi – sem hinum lötu fjölmiðlum Íslands yfirsást – fólust í því sem Katrín Jakobsdóttir sagði þvínæst ofan í sannfæringarlítið svar sitt um ESB. Hún sagði skýrt að VG væri ekki mótfallið því að fara í þjóðaratkvæðagreiðslu um aðildarumsóknina.
Þarna bjó hún til einstakt tækifæri fyrir Samfylkinguna. Mér er til efs að VG og Katrín leggi í nokkra ríkisstjórn með Samfylkinguna utan stjórnar. Það yrði raunar óðs manns æði fyrir VG. Einkum einsog staðan er að þróast þar sem Samfó er á blússandi uppleið – á hárréttum tíma.
Össur les það út úr stöðunni í pólitíkinni í dag að dauðafæri gefist núna til að endurnýja aðildarumsókn að ESB í væntanlegri vinstri stjórn:
Í dag er pólitíska staðan þannig að Miðflokkurinn hefur gert vinstri vængnum þann greiða að stýfa gersamlega hægri kantinn. Framsókn er í rúst, og Sigmundur heldur Sjálfstæðismönnum í 22-23 %. Kjósendur eiga svo einungis eftir að husla Bjarta framtíð og Viðreisn. Það verður því ekki hægt að mynda stjórn til hægri.
Langlíklegast er að í fyrstu lotu stjórnarmyndunarviðræðna fái formaður VG umboð til að spreyta sig. Ef Samfylkingin vill, og telur rétt fyrir land og þjóð, þá hefur hún í hendi sér að setja það sem skilyrði fyrir stjórnarþátttöku að ný ríkisstjórn efni til þjóðaratkvæðagreiðslu um aðildarumsóknina.
Katrín hefur gefið upp boltann. Við Valsmenn myndum kalla þetta dauðafæri…