Lögreglan í Kaupmannahöfn veit ekki hvað varð til þess að sextán ára piltur var skotinn til bana í borginni í gærkvöldi. Áður en að árásinni kom hafði pilturinn verið að spila fótbolta með tveimur vinum sínum á Austurbrú.

Hans Erik Raben, yfirmaður rannsóknardeildar lögreglu, segir við danska fréttamiðla að pilturinn hefði verið skotinn minnst sex sinnum. Hann var úrskurðaður látinn á vettvangi. Vitni sögðust hafa séð tvo til fjóra pilta, líklega á aldrinum 15 til 20 ára, hlaupa frá vettvangi og inn í bifreið sem síðan var ekið burt.

Hans Erik segir að pilturinn hafi verið ósköp venjulegur unglingur og telur hann að morðið tengist ekki þeirri hrinu ofbeldisverka sem tengjast skipulagðri glæpastarfsemi í borginni. Drengurinn var sonur innflytjenda frá Makedóníu en fæddur og uppalinn í Danmörku.

Tilkynnt var um skotárásina klukkan 21.05 í gærkvöldi og reyndu íbúar í nærliggjandi húsum að hlúa að fórnarlambinu þar til sjúkraflutningamenn komu á staðinn. Hans Erik biðlaði til fólks að gefa sig fram hafi það einhverjar upplýsingar um málið.