16 ára piltur var skotinn til bana á Ragnhildgade á Austurbrú í Kaupmannahöfn í gærkvöldi. Lögreglunni var tilkynnt um skothríð á svæðinu klukkan 21.05 og skömmu síðar fannst pilturinn í bakgarði húss við götuna. Læknir úrskurðaði hann látinn á vettvangi.

Lögreglan hefur ekki viljað segja mikið um málið annað en að pilturinn hafi verið skotinn til bana og að hann hafi verið skotinn mörgum skotum. Lögreglan hefur hvatt vitni að skotárásinni til að gefa sig fram sem og vini og kunningja þess látna sem voru með honum í gærkvöldi. Ekki er vitað hvort morðið tengist átökum glæpagengja í Kaupmannahöfn en oft hefur komið til átaka á milli stríðandi glæpagengja undanfarið.

Um klukkan 14 í gær fannst beinagrind af kornabarni í garði við fjölbýlishúsahverfi í Glostrup í Kaupmannahöfn. Það var smiður, sem er að störfum á svæðinu, sem fann beinagrindina og tilkynnti lögreglunni samstundis um málið.

Um er að ræða gróið svæði á milli fjölbýlishúsa, svæði þar sem börn leika sér og íbúar fjölbýlishúsanna nota til útivistar og til að grilla. Viðamiklar endurbætur standa yfir á fjölbýlishúsum á svæðinu og því margir iðnaðarmenn að störfum þar.

Lögreglan var með mikinn viðbúnað á svæðinu í gær og fór umfangsmikill vettvangsrannsókn fram. Hlé var gert á störfum lögreglu um klukkan 19 en aftur verður hafist handa við vettvangsrannsókn nú í morgunsárið.
Ekkert hefur verið látið uppi um málið af hálfu lögreglunnar nema hvað staðfest hefur verið að beinagrind af kornabarni hafi fundist.