Sverrir Agnarsson, fyrrverandi formaður Félags múslíma á Íslandi, segir í þræði á Facebook að eina lausnin við kynferðislegri áreitni sé búrka. Líkt og flestir hafa tekið eftir hefur fjöldi kvenna stigið fram á Facebook í dag undir myllumerkinu #églíka og sagt frá upplifun sinni af kynferðislegri áreitni.

Þórarinn Þórarinsson blaðamaður gerir á Facebook-síðu grín að hegðun sumra karla sem hafa líka greint frá kynferðislegri áreitni og lét Sverri ummæli sín um búrkuna falla í athugasemdum við þá færslu.

„Ógeðslega fyndið þetta feðraveldi! Konur stíga nú fram á Facebook og segja frá kynferðislegu áreiti sem þær hafa orðið fyrir. Trommar þá ekki karlakórinn upp til þess að láta vita að hann hafi sko líka verið áreittur kynferðislega. Mér sýnist að vísu súbtextinn í þeim harmagráti yfirleitt vera nett mont yfir að þeir séu svo miklir hönkar að konur hafi áhuga á því að klípa þá í púnginn eða slá á rassinn á þeim,“ skrifar Þórarinn.

Þó flestir tengi búrku við múslima í dag þá bendir Sverrir réttilega á að uppruna búrkunnar megi rekja til Persíu og Miklagarðsríkis til forna. „Gömlu menningarsamfélögin í Iran og Byzans og enn önnur sem voru fyrr á ferð voru fyrir löngu búin að komast að því að búrkan er það eina sem virkar. Hafði ekki viðrinið Trump rétt fyrir sér – ef þú átt pening þá…- Allavega jákvætt ef penngurinn sé hættur að virka. Kalli á Hóli var blankur og laminn þegar hann reyndi við Guddu en hreppstjórinn mátti,“ segir Sverrir og vitnar þar í lagið Kalli á Hóli eftir Bjarna Guðmundsson.