Daphne Caruana Galizia, blaðakona frá Möltu sem var áberandi í umfjöllun um Panama-gögnin svonefndu, var drepin í bílsprengjuárás í dag.
Svo virðist vera sem bílsprengju hafi verið komið fyrir undir Peugeot-bifreið hennar með fyrrgreindum afleiðingum. Sprengjan var mjög öflug og var bifreiðin rústir einar.
Enginn hefur lýst ábyrgð á sprengjuárásinni.
Daphne var sjálfstætt starfandi blaðamaður og vöktu greinar hennar jafnan gríðarlega mikla athygli. Hún var þekkt í heimalandi sínu fyrir afhjúpandi greinar um spillingu og var hún stundum sögð vera „eins manns Wikileaks“ sem var vísun í uppljóstrunarvefinn fræga. Hún fjallaði um spillingarmál af öllu tagi; mafíuna, peningaþvætti og veðmálabrask svo dæmi séu tekin.
Undanfarin tvö ár hafði hún að mestu einbeitt sér að fréttum upp úr Panama-skjölunum.
Í nýlegri umfjöllun sinni fjallaði hún um forsætisráðherra Möltu, Joseph Muscat, og tvo nána bandamenn hans. Var aflandsfyrirtæki, sem sagt var tengjast þeim, bendlað við þremenninganna og sölu á maltneskum vegabréfum.
Forseti Möltu, Marie-Louise Coleiro Preca, kallaði eftir því í dag að fólk sýndi stillingu. Sagði hann að um hörmulegan atburð væri að ræða og fólk ætti að sameinast á tímum sem þessum.
Sjálfur fordæmdi Joseph Muscat árásina og sagðist hann þegar hafa rætt við lögreglu og hvatt hana til að starfa með löggæslustofnunin í öðrum löndum vegna málsins. Síðar kom á daginn að lögreglan á Möltu ætti von á aðstoð frá fulltrúum bandarísku alríkislögreglunnar, FBI. Sagði hann að þó að honum og Daphne hefði ekki komið vel saman væri ekkert sem réttlætti jafn skelfilegan atburð.
Í umfjöllun Guardian kemur fram að Daphne hefði haft samband við lögreglu fyrir um hálfum mánuði vegna líflátshótanna.