Á átta mánaða tímabili missti 11 ára kanadískur drengur sjónina smátt og smátt þar til hann sá aðeins um 30 sentimetra frá sér. Það var ekki fyrr en læknar uppgötvuðu hvað hann borðaði reglulega sem þeir komust að orsök blindunnar.
Skýrt var frá málinu í októberútgáfu JAMA Pediatrics Clinical Challenge. Fram kemur að drengurinn hafði tapað nætursjóninni og var mjög viðkvæmur fyrir birtu og sá mjög illa. Hann gat ekki séð hönd, sem var veifað framan við hann, ef hún var í meira en 30 sentimetra fjarlægð.
Auk þess voru augu hans alltaf mjög þurr. Það tók lækna langan tíma að finna út hvað þjáði drenginn. Hann þjáðist einnig af margskonar ofnæmi gagnvart ýmsum matvælum en það hafði í för með sér að hann varð að fylgja mjög ströngu mataræði. Það eina sem hann mátti borða voru kartöflur, svínakjöt, lambakjöt, epli, gúrkur og Cheerios. Ef hann borðaði eitthvað annað fékk hann slæm útbrot.
En þessi samsetning matvæla er óheppileg því öll eiga þau það sameiginlegt að lítið er af A-vítamíni í þeim en það er mjög mikilvægt fyrir sjónina.
Vítamínskortur er sjaldgæft fyrirbrigði í þróuðu ríki eins og Kanada en þetta mál hefur nú orðið til þess að beina á meiri athygli að börnum sem þurfa að fylgja ströngu mataræði til að tryggja að þau fái þau vítamín og steinefni sem líkamar þeirra þurfa til að geta starfað eðlilega.
Læknar meðhöndluðu drenginn með því að gefa honum risastóra skammta af A-vítamíni. Þeir eru ekki vissir um að drengurinn muni jafna sig að fullu og fá fulla sjón á nýjan leik.