Þegar Derek Staines og eiginkona hans, sem búa í Indiana í Bandaríkjunum, fóru í frí til Longboat Key í Flórída gerðu þau hræðilega uppgötvun. Þau höfðu leigt sér íbúð í gegnum Airbnb. Þetta eyðilagði fríið þeirra og gæti snert margra aðra sem hafa leigt þessa sömu íbúð.

Á meðan á dvöl þeirra hjóna í íbúðinni stóð uppgötvuðu þau að myndavél var falin í reykskynjara í svefnherberginu. Þau tilkynntu lögreglunni um málið og gerði hún húsleit. Lögreglan telur að húseigandinn hafi jafnvel komið myndavélinni fyrir í reykskynjaranum fyrir 10 árum og hafi síðan njósnað um leigjendur.

Abcactionnews.com skýrir frá þessu. Fram kemur að í íbúðinni hafi lögreglan fundið tölvur, drif, minniskort og færanleg drif. Allt var þetta haldlagt og tekið til rannsóknar. Lögreglan óttast að fjöldi fólks hafi verið myndaður án þess að hafa nokkra vitneskju um það. Í kjölfar húsleitarinnar var Wayne Natt, 56 ára, handtekinn en hann á íbúðina.

Natt sagði við yfirheyrslur að þeir sem hann hafi myndað í íbúðinni hafi heimilað honum það. Bob Borque, hjá lögreglunni, sagði í framhaldi af því hafi lögreglan spurt hvers vegna myndavélin hafi verið falin í reykskynjaranum ef fólk hafi gefið samþykki sitt fyrir að teknar væru myndir af því og kynlífsathöfnum þess. Þessu svaraði Natt í yfirheyrslu og sagði að þannig „fengi hann betra sjónarhorn“.