Sjálfstæðismenn og fulltrúar Viðreisnar hafa samþykkt stjórnarsáttmála ríkisstjórnar Sjálfstæðisflokks, Viðreisnar og Bjartrar framtíðar
Flokksráð Sjálfstæðisflokksins og ráðgjafaráð Viðreisnar hafa samþykkt stjórnarsáttmálann sem flokkarnir hafa ásamt Bjartri framtíð búið til. Björt framtíð hefur enn ekki samþykkt sáttmálann en fundur í stjórn flokksins stendur enn yfir eftir því sem DV kemst næst.
Bjarni Benediktsson, formaður Sjálfstæðisflokksins, sagði í kvöldfréttum RÚV að hann myndi ekki leita út fyrir raðir þingflokksins að ráðherraefnum. Á morgun myndi hann gera tillögu um það hverjir verði ráðherrar flokksins. „Ég er mjög sáttur við þennan sáttmála,“ sagði hann meðal annars við RÚV. Engar gagnrýnisraddir hafi komið fram á fundi Sjálfstæðismanna.
Í seinnifréttum RÚV var rætt við Benedikt Jóhannesson, formann Viðreisnar. Á þeim bænum var stjórnarsáttmálinn samþykktur einróma. Fundur ráðgjafaráðsins hafi ekki verið átakafundur en að hann hafi verið líflegur. „Auðvitað er þessi sáttmáli eins og allir sáttmálar af þessu tagi málamiðlun.“
Hann boðaði endurskoðun peningastefnunnar og breytingar í landbúnaðar- og sjávarútvegsmálum. Vísir greinir frá því á vef sínum að á fundi Viðreisnar hafi komið fram ósætti með Bjarna Benediktsson, vegna skýrslunnar um skattaskjólseignir Íslendinga, sem Bjarni beið með að birta fram yfir kosningar – þrátt fyrir að hún hafi verið tilbúin í september. Heimildir DV herma að ósættið birtist bæði í baklandi flokksins og í þingflokki hans.
Þá greinir Vísir frá því að ósætti sé einnig innan raða Bjartrar framtíðar, vegna skattaskjólsskýrslunnar.
Í stjórnarsáttmálanum kveður á um að lögð verði fram þingsályktunartillaga fyrir loks þings um það hvort kjósa eigi um áframhaldandi aðildarviðræður við Evrópusambandið.