Trump er enn ekki sannfærður
Bandaríska leyniþjónustan staðfestir nú loks kenningar um að Vladimir Pútín hafi haft hendur í sigri Donalds Trump í nýafstöðnum forsetakosningum Bandaríkjanna.
Í kjölfar kosninganna í Bandaríkjunum spruttu fram kenningar og ásakanir þess efnis að Vladimir Pútín, Rússlandsforseti, hefði átt þátt í sigri Donalds Trump. Rússnesk yfirvöld hafa neitað ásökunum en yfirvöld í Moskvu hafa enn ekki gefið frá sér yfirlýsingu að sögn fréttamiðils BBC.
Nú þykir nokkuð öruggt að halda því fram að ítökin hafi átt sér stað, en það staðfestir bandarísk rannsóknarskýrsla sem gefin var út af NSA, CIA og FBI.
Öll tæknileg atriði sem sannað gætu ítök Rússlands í kosningunum eru þó hulin í skýrslunni og því er ólíklegt að skýrslan sannfæri mestu efasemdarmenn um málið fyllilega. Ennfremur þykir ósannað að ítök Rússlands hafi ráðið úrslitum í kosningunum. Þessu greinir fréttamiðill The Guardian frá í gær.
Í skýrslunni kemur fram að Rússland hafi:
Brotist inn í netpóst hjá ymsum háttsettum Demókrötum.
Notað milliliði svo sem WikiLeaks, DC Leaks.com og Guccifer 2.0 persona til þess að leka upplýsingum úr netpóstunum
Loks hafi þeir notast við ríkisrekna áróðursmiðla og borgað notendum samfélagsmiðla eða svokölluðum “tröllum” til þess að gera andstyggilegar athugasemdir.
Þrátt fyrir vöntun á smáatriðum í skýrslunni, þá hafa bandarískar leyniþjónustur aldrei áður staðfest opinberlega að erlend ítök hafi starfað í hag nýkosins forseta, að sögn The Guardian.
Áður hafði Donald Trump algerlega neitað öllum ítökum Rússlands í sigri sínum. Nú þegar skýrslan er komin út þá segist hann ekki styðja grundvallarútkomu hennar að Kremlin hafi verið að baki net-herferðarinnar, að sögn BBC. Trump vill þá heldur ekki meina að hún hafi valdið úrslitum í kosningunum.
