Myndbandið hefur verið rannsakað í tvö ár en sérfræðingar eru engu nær
Þann 11.nóvember 2014 var þyrla síleska sjóhersins á hefðbundu eftirlitsflugi um þarlenda lögsögu. Þyrlan var af gerðinni Airbus Cougar AS-532 og um borð voru, auk flugmannsins, þaulreyndur liðþjálfi og tæknimaður. Tæknimaðurinn nýtti ferðina til þess að prófa nýja infra-rauða eftirlitsmyndavél af gerðinni WESCAM MX-15 HD.
Þyrlan var í rúmlega 4.500 feta hæð og voru veðurskilyrði óvenju góð. Það var heiðskýrt og 10 gráðu hiti úti. Klukkan 13.52 varð tæknimaðurinn var við einkennilegt tæki sem flaug yfir sjónum í fjarska. Hann beindi myndavélinni þegar að furðuhlutnum, gerði liðþjálfanum aðvart og fljótlega voru augu mannanna sem límd á hinu einkennilega fyrirbæri. Flughæðin var sú sama og hjá herþyrlunni sem og flughraðinn. Fjarlægðin milli furðuhlutarins og þyrlunnar var að mati mannanna um 55-65 kílómetrar.
Á meðan þessu stóð hafði flugmaður þyrlunnar samband við tvær ratsjárstöðvar á jörðu niðri og lét vita af þessum óboðna gest. Hvorug stöðin gat greint furðuhlutinn, þrátt fyrir að hann væri innan eftirlitssvæðis þeirra, en herþyrlan sást greinilega. Flugumferðarstjórn landsins skömmu síðar að engar tilkynningar, fyrir utan sjálfa herþyrluna, væru um flug á þessum slóðum. Eftirlitstæki herþyrlunnar sjálfar gátu ekki greint neitt heldur. Aðeins myndavélin og augu hermannanna tveggja voru til vitnis um fyrirbærið. Allar tilraunir til þess að hafa samskipti við furðuhlutinn voru án árangurs.
Myndskeiðið sem tæknimaðurinn tók upp er rúmlega 9 mínútur að lengd. Það er tekið upp á infra-rauðri stillingu sem gerir það að verkum að það er svart hvítt. Því dekkri sem litirnir eru því heitari er hluturinn.
Þegar þyrlan sneri aftur til herstöðvarinnar þá var myndbandið tafarlaust afhent til CEFAA – síleskrar stofnunar sem rannsakar fljúgandi furðuhluti. Tekin var skýrsla af mönnunum í borð og voru þeir sammála um að þeir gætu ekki útskýrt hvað fyrir augu þeirra bar.
Síðan þá hefur myndbandið verðið rannsakað í þaula af síleskum yfirvöldum. Í frétt Huffington Post um málið kemur fram að þeir sérfræðingar sem hafa skoðað það hafi allir verið eitt spurningamerki.
Fjölmargar tilgátur hafa verið bornar fram, meðal annars að um rússneskt geimrusl væri að ræða, þarna væri einfaldlega farþegaþota eða jafnvel óþekkt þyrla á ferðinni. Þá hefur því verið haldið fram að um stóran fugl hafi verið að ræða, flygildi eða dróna frá erlendum her, fallhlíf eða einhverskonar sviffluga. Sérfræðingar hafa hinsvegar bent á sannanir sem útiloka þessar tilgátur. Áhugasamir geta kynnt sér þær á vef Huffington Post.
Hér má berja myndbandið augum í fullri lengd: