Tvær stærstu bílaleigur landsins veltu samtals 8,7 milljörðum krónum og skiluðu hagnaði upp á rúman hálfan milljarð árið 2015. Velta fyrirtækjanna tveggja jókst um 1,5 milljarð króna milli ára og hagnaður þeirra um 182 milljónir. Þetta kemur fram í ársreikningum Alp hf, sem rekur Avis og Budget-bílaleigurnar, og Bílaleigu Akureyrar (Höldur ehf.) fyrir árið 2015. Síðan þá hefur fjöldi ferðamanna aðeins aukist og umsvif ferðaþjónustunnar einnig.

Mikil aukning

Skráðir bílaleigubílar í umferð og á númerum voru 16.358 í júní 2015. Fyrirtækin tvö sem hér um ræðir áttu umtalsverða hlutdeild í þeim fjölda. Miðað við sprenginguna sem orðið hefur á fjölda ferðamanna er því ekki að undra að uppgangur hefur verið hjá stærstu aðilum á bílaleigumarkaði.

130% á 5 árum

Rekstrartekjur Alp hf. námu rúmum þremur milljörðum króna árið 2015 en höfðu numið rúmum 2,3 milljörðum árið 2014. Þá jókst hagnaður fyrirtækisins úr 121 milljón króna í rúma 231 milljón króna á sama tíma. Árið 2015 voru eignir fyrirtæksins metnar á 4,8 milljarða en skuldir námu rúmum 4 milljörðum.

Til samanburðar þá voru rekstrartekjur ALP 1,3 milljarðar króna árið 2010 og jókst því á fimm árum um 130 prósent.

159% á fimm árum

Hjá Bílaleigu Akureyrar námu rekstartekjur ársins 2015 tæpum 5,7 milljörðum króna en voru rúmir 4,7 milljarðar árið áður. Hagnaðurinn fór úr 252 milljónum í 335 milljónir. Árið 2015 voru eignir fyrirtækisins metnar á 10,6 milljarða króna en skuldir rúmum 11 milljörðum.

Velta Bílaleigu Akureyrar nam til samanburðar 2,2 milljörðum króna árið 2010. Á fimm árum hefur veltan því aukist um 159 prósent.