Rúmlega þúsund manns bættust við í bakvarðasveit Landsbjargar um helgina en um er að ræða hóp fólks sem styrkir björgunarsveitir landsins með mánaðarlegu framlagi.

Þetta segir Jón Svanberg Hjartarson, framkvæmdastjóri Landsbjargar, í samtali við Morgunblaðið í dag.

„Það fjölgaði í þessum hóp um rúmlega eitt þúsund manns og er enn að bætast við. Þá fjölgaði líka einskiptis styrktarskráningum þar sem fólk gefur frjálst framlag í eitt skipti,“ segir Jón Svanberg.

Velvilji almennings í garð björgunarsveitanna hefur ekki farið framhjá neinum á undanförnum dögum. DV greindi til dæmis í gær frá skemmtilegu atviki á Blönduósi á sunnudag. Björgunarsveitin Blanda tók þátt í leitinni að Birnu Brjánsdóttur um helgina en á sunnudag, þegar björgunarsveitin snéri aftur til Blönduóss, bauðst maður til að greiða fyrir eldsneyti á bíl sveitarinnar. „Við þáðum það með þökkum,“ sagði Hjálmar Björn Guðmundsson, formaður sveitarinnar, í samtali við DV.

„Samstaðan er bæði ólýsanleg og ómetanleg fyrir okkur og alla þá sem komu að þessu erfiða máli á einn eða annan hátt,“ segir Jón Svanberg við Morgunblaðið og bætir við að fjöldi fyrirtækja hafi sett sig í samband til að færa leitarfólki mat. Svo mikill matur barst að á tímabili var yfirfullt hjá Landsbjörg.