Mennirnir tveir sem sitja í gæsluvarðhaldi á Litla-Hrauni vegna rannsóknarinnar á hvarfi og andláti Birnu Brjánsdóttir heita Thomas Möller Olsen og Nikolaj Olsen. Þeir hafa réttarstöðu grunaðra í málinu samkvæmt heimildum DV.

Fréttablaðið greinir frá því í dag að Thomas, sem er 24 ára, hafi ekið rauða Kia Rio-bílnum frá Hafnarfjarðarhöfn að morgni laugardagsins 14. janúar síðastliðinn þar sem hann er talinn hafa farið um 300 kílómetra leið.

Nikolaj er aftur á móti sagður hafa farið aftur um borð í Polar Nanoq þennan morguninn. Eins og DV greindi frá 17. janúar síðastliðinn voru tveir menn í bílnum þegar honum var lagt fyrir utan togarann um klukkan 06:10 um morguninn, sama dag og Birna hvarf. Einn maður, sem Fréttablaðið segir að sé Nikolaj, fór þá út úr bílnum og um borð í skipið. Bílstjórinn, sem sagður er hafa verið Thomas, beið einn í bílnum til um klukkan sjö, eða þar til hann svo ók bílnum af hafnarsvæðinu.

Heimildir DV herma að skilríki Birnu hafi fundist í togaranum Polar Nanoq, en þeir sem fara fyrir rannsókninni hafa ekki viljað staðfesta þær heimildir. Þá hafa þeir sem stýrt hafa rannsókninni ekki viljað gefa það upp hvort lífsýni úr Birnu hafi fundist víðar en í bílnum, svo sem á fatnaði sakborninga.

Mennirnir sitja nú í einangrun á Litla-Hrauni en Hæstiréttur staðfesti tveggja vikna gæsluvarðhaldsúrskurð héraðsdóms yfir þeim í gær. Í Fréttablaðinu segir að Thomas og Nikolaj verði yfirheyrðir í dag, en þeir voru síðast yfirheyrðir á fimmtudag og föstudag.