Samtök útgerðarmanna á Grænlandi ósátt
Grænlensk stjórnvöld hafa sagt að það að menn úr áhöfn Polarn Nanoq notuðu togarann til að smygla eiturlyfjum gæti orðið til þess að hann verði sviptur veiðiréttindum.
RÚV greinir frá því í morgun að Hans Enoksen, sjávarútvegsráðherra grænlensku landstjórnarinnar, hafi sagt að útgerðir grænlenskra togara verði að koma í veg fyrir að skipin séu notuð í þessum glæpsamlega tilgangi.
Í fréttinni segir að ef grænlenskir togarar verði áfram notaðir til að smygla eiturlyfjum muni grænlenska þingið íhuga að takmarka kvóta þeirra skipa sem notuð eru með þessum hætti.
Samtök útgerðarmanna á Grænlandi eru gríðarlega ósátt við þessi ummæli sjávarútvegsráðherra. Þau segja það óviðeigandi að útgerð sé hótað vegna lögbrots starfsmanns.
Líkt og áður hefur komið fram fundust 20 kíló af hassi um borð í Polarn Nanoq við leit lögreglu um borð í togaranum aðfaranótt fimmtudagsins 19 janúar. Einn skipverji var handtekinn í tengslum við rannsókn lögreglu á því máli.