Það var um klukkan eitt í dag sem áhöfn TF-LIF, þyrlu Landhelgisgæslunnar fann lík í fjörunni vestur af Selvogsvita. Talið er að líkið sé að Birnu Brjánsdóttur en hennar hefur verið saknað í rúma viku. Lögreglan á höfuðborgarsvæðinu boðaði til blaðamannafundar klukkan 17 í Rúgbrauðsgerðinni og greindi frá stöðu mála.
Þar kom fram að talið er að Birna hafi ekki hitt skipverjana á grænlenska togaranum áður. Þá sagði Grímur að ekki hefðu fundist lífsýni á fleiri stöðum en í bílnum. Grímur tók þó fram að enn ætti eftir að rannsaka hluti sem teknir voru um borð í skipinu. Á fundinum kom einnig fram að lögregla telji ekki að líkinu hafi verið kastað frá borði skips.
Þá greindi Grímur frá því að lögreglan leitar að vopni en ekki er vitað hvernig Birnu var ráðinn bana. Það mun liggja fyrir þegar búið er að rannsaka áverka. Dánarorsök mun liggja fyrir innan fáeinna daga en Grímur sagði yfirgnæfandi líkur á að Birnu hefði verið ráðinn bani.
Sigríður Björk Guðjónsdóttir lögreglustjóri á höfuðborgarsvæðinu vottaði fjölskyldu Birnu samúð sína. Þá kom hún á framfæri þakklæti til yfirvalda og björgunarsveitarmanna frá fjölskyldu Birnu.
Mennirnir sem eru í haldi vita að blóð fannst í bílnum en vita ekki að Birna er fundin. Þeir neita enn sök.