Lögreglufulltrúi segir um bjánaskap hafa verið að ræða
Krókódíll réðst á og banaði manni í norðurhluta Ástralíu síðastliðinn fimmtudag. Maðurinn var á ferð með tveimur konum og óðu þau yfir á í Kakadu þjóðgarðinum. Konurnar tvær komust yfir en áttuðu sig þá á að maðurinn hefði ekki fylgt þeim eftir.
Svo virðist sem 3,5 metra langur krókódíll hafi ráðist á manninn og banað honum. Lík hans fannst á fimmtudagskvöld um tveimur kílómetrum neðar í ánni. Krókódíllinn sem talinn er hafa banað manninum var skotinn.
Áin sem maðurinn reyndi að vaða, og svæðið allt, er þekkt að því að þar sé krökkt af krókódílum. Viðvörunarskilti eru víða á svæðinu þar sem fólk er varað við krókódílunum og bent á að halda sig frá vatninu.
Lögreglufulltrúinn Bob Harrison segir í viðtali við Sky News að tilraunir til að vaða yfir ána séu „bjánaskapur“. Árið 1987 réðst krókódíll á Kerry McLaughlin og banaði honum en McLaughlin var við veiðar ásamt syni sínum þegar ráðist var á hann.